ಮನಸು

ಎಷ್ಟು ಆಯಾಮಗಳೋ
ಈ ಹುಚ್ಚು ಮನಸಿಗೆ.
ಒಮ್ಮೆ ನಗು, ಒಮ್ಮೆ ಅಳು,
ಕಡು ಬೇಸರವೊಮ್ಮೆ,
ಹರ್ಷದ್ಹೊಳೆಯ ಚಿಲುಮೆ.
ಅಚ್ಚರಿಯ ವೈಪರೀತ್ಯ,
ಕ್ಷಣ ಚಿತ್ತ ಕ್ಷಣ ಪಿತ್ಥ,
ಗೌಜು ಗದ್ದಲದ ನಡುವೆ
ಕಾಡೋ ಒಂಟಿಬಡುಕತನ.
ಆದರದು ಶಾಶ್ವತವಲ್ಲ,
ಕ್ಷಣ ಕಳೆದರೆ ಮತ್ತೆ,
ಸಂತಸ ಚಿಮ್ಮುತ್ತೆ.
ಏನೀ ಮನಸಿನ ಪರಿ?
ಕೈಗೆಟುಕದ ಕಳ್ಳನೇ ಸರಿ.
ಲೋಕಗಳ ಜೈಸಿದ್ದ ಧೀರರೆಷ್ಟೋ ಮಂದಿ,
ಮನ ಮರ್ಕಟದೆದುರು ಚಿಂದಿ.
ಏನೀ ಮನಸಿನ ಲೀಲೆ?
ಯೋಚನೆಗಳ ಸರಮಾಲೆ.
ಬಿಡುವಿರದೆ ದಡಕೆ ಬಡಿವ
ಕಡಲಲೆಗಳಂತೆ.
(ತರಂಗ ವಾರಪತ್ರಿಕೆಯಲ್ಲಿ ಪ್ರಕಟಿತ)